ԵԽԽՎ-ի դերը Հայաստանի կամ Ադրբեջանի կողմն անցնելը չէ: Այս մասին այսօր՝ մայիսի 31-ի մամուլի ասուլիսում լրագրողներին ասել է ԵԽԽՎ-ի ղեկավար Ժան-Կլոդ Մինյոնը:
Նրա խոսքով՝ ղարաբաղյան հակամարտության կարգավորմանն աջակցելու հարցում ԵԽԽՎ-ի դերը ԵԱՀԿ Մինսկի խմբի ջանքերին օժանդակելն է՝ խորհրդարանական դիվանագիտության օգնությամբ: «Մինսկի խումբը եւս Եվրախորհրդի 47 անդամների կարիքն ունի»,- ընդգծել է նա:
Նա հիշեցրել է, որ վերջերս Ֆրանսիան եւ Գերմանիան նշել են Ելիսեյան պայմանագրի կնքման 50-ամյակը: «Անհնարին ոչինչ չկա: Այն, ինչ հնարավոր եղավ Ֆրանսիայի եւ Գերմանիայի համար, հնարավոր է նաեւ Հայաստանի եւ Ադրբեջանի համար»,- ընդգծել է Մինիոնը:
Խոսելով Ղարաբաղի հարցով ենթահանձնաժողովի մասին՝ ԵԽԽՎ նախագահը նշել է, որ իր նախորդների նախաձեռնությամբ ստեղծված հանձնաժողովը չէր կարող աշխատել այն պատճառով, որ կողմերից մեկը հրաժարվում էր նրա աշխատանքն օրինական ճանաչելուց: «Ես կցանկանայի, որ այդ հարցում առաջընթացի ուղղությամբ աշխատեր ԵԱՀԿ Մինսկի խումբը: Բոլոր երկխոսությունները պետք է Մադրիդյան սկզբունքների վրա հիմնված լինեն: Մենք չպետք է հանդես գանք Մինսկի գործընթացին խանգարող նախաձեռնությամբ»,- նշել է նա:
Մինյոնն ընդգծել է, որ ԵԽԽՎ-ի դերը բացարձակ չեզոքություն պահպանելն է, որը հաջող բանակցությունների գրավականներից է:
Լուսանկարը՝ Արսեն Սարգսյանի / NEWS.am