Սուրեն Խաչատրյանի դեմ եւս պետք է քրեական գործ հարուցվի: Այս մասին, այսօր` հունիսի 7-ին, մամուլի հրավիրված ասուլիսին ասաց «Ժառանգություն» կուսակցության ԱԺ պատգամավոր Զարուհի Փոստանջյանը: Նա հիշեցրեց, որ Սուրեն Խաչատրյանն ասել է, որ եթե դեպքի պահին քնած չլիներ, քսան հատ «կշարեր» նրանց ճակատին, նաեւ սպառնացել է նաեւ Րաֆֆի Հովհաննիսյանի գլուխը ջարդել:
«Հաշվի առնելով այդ մարդու անցյալը որ նա բռնարարքներ է կատարել եւ բռնության կոչեր արել, նաեւ նրա տնից հայտնաբերված զինամթերքը, կարծում եմ, որ գոնե այդ պահով նրա նկատմամբ պետք է մեղադրանք առաջադրված լիներ»,- ասաց պատգամավորը:
Զարուհի Փոստանջյանի խոսքով՝ Սուրեն Խաչատրյանը չունենալով մեղադրյալի կարգավիճակ, մնալով ազատության մեջ, խոչընդոտում է քննությանը: «Այո, ոչ միայն խոչընդոտում է, այլեւ հնարավոր է նաեւ իքնն այնքան վտանգավոր է, որ կարող է նաեւ այլ վտանգավոր արարք թույլ տալ, այլ անձանց կյանքի եւ առողջության հետ կապված: Որքան շուտ այդ մարդուն մեղադրանք առաջադրեն եւ վերցնեն կալանքի տակ, այնքան հասարակությունն այդ ամենից կօգտվի եւ կազատվի վտանգավոր մարդկանց ոտնձգություններից, ինչպիսին է Սուրեն Խաչատրյանը»,- նշեց Զարուհի Փոստանջյանը եւ հավելեց, որ դա կարող է կանխարգելիչ բնույթ կրել նմանատիպ այլ պաշտոնյաների համար:
Լուսանկարը՝ Արսեն Սարգսյանի/NEWS.am