Հունիսի 12-ին Վրաստանում Հայաստանի դեսպան Հովհաննես Մանուկյանն այցելել է Գորի` հունիսի 6-ին Աֆղանստանում ահաբեկչության հետեւանքով զոհված Վրաստանի զինված ուժերի զինծառայող, ծագումով հայ Գեորգի Ադամովի քաղաքացիական հոգեհանգիստին:
Վրաստանում Հայաստանի դեսպանատան մամուլի ծառայությունից հայտնում են, որ դեսպան Մանուկյանը ցավակցություն է հայտնել զոհվածի հարազատներին եւ մերձավորներին, հոգեհանգիստին ներկա գտնվող Վրաստանի զինվորական գերատեսչության բարձրաստիճան սպաներին: Դեսպանին ուղեկցել են Վրաստանի նախագահի խորհրդական Վան Բայբուրթյանը, ՀԱԵ Վիրահայոց թեմին կից «Հայարտուն» մշակութային կենտրոնի համակարգող Լեւոն Չիդիլյանը, թբիլիսահայ համայնքի եւ հոգեւոր դասի ներկայացուցիչներ:
Մինչ այդ Վրաստանում ՀՀ դեսպանը ցավակցական ուղերձ էր հղել ողբերգական միջադեպի կապակցությամբ, որում ասվում էր. «Խորին ցավակցությունս եմ հայտնում Աֆղանստանում խաղաղապահ առաքելություն իրականացնող վրաց զինծառայողների ընտանիքներին եւ հարազատներին` նրանց ողբերգական մահվան կապակցությամբ: Կիսում եմ այս ցավն ու կորուստը վրաց ժողովրդի հետ եւ դատապարտում անհանդուրժողականության ու ահաբեկչության ցանկացած դրսեւորում»:
Հիշեցնենք, որ Վրաստանի զինված ուժերի զինվորականները ծառայություն էին իրականացնում անվտանգության աջակցման միջազգային ուժերի (ISAF) կազմում: Հունիսի 6-ին մահապարտ ահաբեչի հարձակման հետեւանքով զոհվել էին 7 զինծառայողներ, եւս 9-ը՝ վիրավորվել:
