Հաջորդ շաբաթ Հարավային Կովկասի տարածաշրջան կայցելի ԵԱՀԿ գործող նախագահ, Ուկրաինայի ԱԳ նախարար Լեոնիդ Կոժարան:
Նա սկզբում կլինի Բաքվում, այնուհետեւ կժամանի Երեւան: Թբիլիսիում նա եղել էր ավելի վաղ: Դեռ այն ժամանակ էր նախատեսվում այց Հայաստան եւ Ադրբեջան, սակայն տեխնիկական պատճառներով հետաձգվել էր:
Լեոնիդ Կոժարան հուլիսի 8-ին պաշտոնական հանդիպումներ կունենա Բաքվում: Այցի ընթացքում կքննարկվեն ԵԱՀԿ եւ Ադրբեջանի միջեւ համագործակցության եւ ղարաբաղյան հակամարտության կարգավորման հարցեր:
Համաձայն NEWS.am-ի տեղեկատվության` նույն օրը երեկոյան ԵԱՀԿ գործող նախագահը կժամանի Երեւան, նրա հանդիպումները երկրի բարձրագույն ղեկավարության հետ նախատեսված են հուլիսի 9-ին: Հանդիպումների հիմնական թեման ղարաբաղյան հակամարտության կարգավորումն է լինելու:
Չի բացառվում, որ Կոժարան Բաքվից Երեւան ժամանի օդանավով: «Զվարթնոց» օդանավակայանում այս տեղեկությունը ոչ հերքեցին, ոչ հաստատեցին: «Օդանավակայան ժամանող ցանկացած չվերթ սպասարկվում է»,-հայտնեցին օդանավակայանում:
Հիշեցնենք, որ նախորդ նման չվերթի մասին տեղեկատվությունը հիստերիա էր առաջացրել Բաքվում:
