Հայոց ցեղասպանության հիմնախնդիրների իրավական թղթածրարն ամբողջականացնելու նպատակով հատուկ հանձնախումբ է ստեղծվում: Այս մասին, այսօր՝ հուլիսի 6-ին, Երեւանում «Հայոց Ցեղասպանության 100-րդ տարելիցին ընդառաջ» խորագրով իրավաբանների համահայկական երկրորդ համաժողովում հայտարարել է ՀՀ սահմանադրական դատարանի նախագահ Գագիկ Հարությունյանը:
Համաժողովը նվիրված էր Հայոց ցեղասպանության 100-րդ տարելիցին ընդառաջ Սփյուռքում ձեւավորված տարածաշրջանային հանձնախմբերի գործունեության իրավական հարցերի քննարկմանը:
Քննարկվել են ցեղասպանության ենթարկվածների ժառանգների գույքային փոխհատուցման վերաբերյալ դատական ատյաններ անհատական եւ խմբակային կարգով հայցադիմումներ ներկայացնելու, իրավահաջորդության եւ պահանջատիրության ներկայացման այլ հարցեր:
Զեկույցով հանդես են եկել ՀՀ սահմանադրական դատարանի խորհրդական, Սահմանադրական իրավունքի կենտրոնի նախագահ Գեւորգ Դանիելյանը, ՀՀ արդարադատութան նախարարի տեղակալ Եղիշե Կիրակոսյանը, «Արեւմտահայերի ազգային կոնգրես»-ի նախագահ, միջազգային իրավունքի փորձագետ ֆրանսահայ Սուրեն Սերայդարյանը, միջազգային իրավունքի պրոֆեսոր արգենտինահայ Ռոբերտո Մալխասյանը, իրանահայ իրավաբան Ռիտա Ավետիսյանը, Ռուսաստանը ներկայացնող իրավաբաններ Կարեն ներսիսյանը, Սիմոն Ծատուրյանը եւ ոլորտի այլ մասնագետներ: