Մենք բացատրության ենք ակնկալում խորհրդարանական փաստաբան Աուրելիա Գրիգորիուից` Երեւանի միջազգային կոնֆերանսում «Հայաստանի կողմից Ադրբեջանի տարածքների մի մասի գրավման» վերաբերյալ սադրիչ հայտարարությունների առթիվ: Այս մասին հայտնել է Մոլդովայի մարդու իրավունքների կենտրոնի տնօրեն Անատոլի Մունթիանը, հաղորդում է OMEGA-ն:
«Ոչ ոք չի կարող հանդես գալ սառեցված հակամարտությունների նման կարեւոր հարցերին վերաբերող որոշակի մեկնաբանություններով: Այն էլ` անհամապատասխան պահի, անհամապատասխան առիթով», - ընդգծել է Մունթիանը:
Հիշեցնենք, որ օրերս Մոլդովայի խորհրդարանական փաստաբան Աուրելիա Գրիգորիուն Երեւանում տեղի ունեցող միջազգային կոնֆերանսում հայտարարել էր, որ «Հայաստանը գրավել է Ադրբեջանի տարածքի 20%-ը` ադրբեջանցիների նկատմամբ իրականացնելով ցեղասպանություն»: Տվյալ հայտարարությունը բացասական արձագանք էր առաջացրել ինչպես Հայաստանում, այնպես էլ Մոլդովայում, որտեղ քաղաքացիական հասարակության բազմաթիվ ներկայացուցիչներ, քաղաքական գործիչներ դատապարտել էին ելույթը` այն որակելով սադրիչ, որի նպատակն էր սրել իրադրությունը: Մոլդովայի հայ համայնքը հայտնել է խորհրդարանից Աուրելիա Գրիգորիուի հրաժարականը պաշտոնապես պահանջելու իր մտադրության մասին: