Ծաղկաձորում, օգոստոսի 1-10-ին, նախատեսվում է կազմակերպել «ինովացիոն ճամբար»: Այդ մասին NEWS.am-ին ասաց Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը:
Նրա խոսքով՝ ճամբարն իրենից ներկայացնում է ինովացիոն գաղափարներ ունեցող 18-30 տարեկան երիտասարդների հավաք: Հանրապետության մի շարք տեխնոլոգիական հայտնի ընկերությունների ներկայացուցիչներ այդ հավաքի ընթացքում երիտասարդներին կսովորեցնեն լավագույնս մշակել իրենց գաղափարները, այնուհետ նրանց օգնություն կցուցաբերվի ներկայանալ «ԴիջիԹեք» ցուցահանդեսին: Կլինեն մասնագիտական դասախոսություններ՝ ինչպե՞ս ճիշտ մշակել գաղափարը, ինչպե՞ս ճիշտ կառավարել նորաստեղծ ընկերության ֆինանսական գործունեությունը, ինչպե՞ս վարել ճիշտ մարկետինգ եւ այլն:
Կ. Վարդանյանի տեղեկացմամբ՝ արդեն գրանցվել են 25 երիտասարդներ, սպասվում է, որ մասնակիցների թիվը կգերազանցի 50-ը:
Նշենք, որ «ինովացիոն ճամբար» Հայաստանում առաջին անգամ են կազմակերպում:
Լուսանկարը՝ Արսեն Սարգսյանի/NEWS.am