Ամերիկյան միջագետքյան կազմակերպությունը եւ Իրաքի քրիստոնեական օգնության խորհուրդը Հյուսիսային Իրաքում Քուրդիստանի տարածաշրջանային կառավարությանը կոչ են արել պաշտոնապես ներողություն խնդրել ցեղասպանության զոհերի սերունդներ հանդիսացող հայերից ու ասորիներից: Նշվում է, որ ցեղասպանությունը Առաջին աշխարհամարտի տարիներին իրագործել են Օսմանյան Կայսրության դաշնակից քրդերը՝ տարածաշրջանի բնիկ քրիստոնյա բնակչության դեմ:
Ինչպես գրում է PRWeb-ը, Քուրդիստանի տարածաշրջանային կառավարության ղեկավար Մասուդ Բարզանիին ուղղված նամակում, որը նվիրված է Ասորի նահատակների օրվան (օգոստոսի 7), ասորիները պահանջել են պաշտոնապես ճանաչել բնիկ ասորիների ու հայերի ցեղասպանությունը թուրք օսմանցիների եւ նրանց դաշնակից քուրդ ցեղախմբերի ու դաշտային հրամանատարների կողմից:
Ասորիները Իրաքյան Քուրդիստանից պահանջում են նույնպիսի ճանաչում, որն իրենք ցանկանում են արեւմտյան երկրներից՝ Սադամի ռեժիմի կողմից իրագործված «քրդերի ցեղասպանության» նկատմամբ:
