Հայաստանի ԱԳ փոխնախարար Շավարշ Քոչարյանը մեկնաբանել է Ադրբեջանի ԱԳ նախարար Էլմար Մամեդյարովի այսօրվա հայտարարությունը ԼՂ հակամարտության կարգավորման վերաբերյալ, նշելով, որ «մինչև ձեռք չբերվի համաձայնություն ԼՂ կարգավիճակի հարցում, անհնարին է ինքնորոշված ԼՂՀ-ի դեմ Ադրբեջանի կողմից իրականացված ագրեսիայի հետևանքների վերացումը»:
Հիշեցնենք, որ Մամեդյարովն այսօր լրագրողների հետ զրույցում նշել է, որ մադրիդյան փաստաթուղթը ենթադրում է ԼՂ խնդրի փուլային կարգավորում, ըստ որի՝ նախ պետք է վերադարձվեն 5, ապա նաեւ մյուս 2 շրջանները, բռնի տեղահանվածները պետք է վերադառնան իրենց նախկին բնակավայրերը, ճանապարհները պետք է բացվեն, որից հետո միայն պետք է ԼՂ կարգավիճակի վերաբերյալ հանրաքվե տեղի ունենա, բայց այնպես, որ դա չխախտի Ադրբեջանի տարածքային ամբողջականությունը:
«Ադրբեջանը չի հրաժարվում հիմնախնդրի էությունը, հակամարտության բուն պատճառները եւ բանակցային գործընթացը աղավաղելու փորձերից: Նախ անհրաժեշտ է արձանագրել, որ այսօր գոյություն ունի միայն մեկ փաստաթուղթ, որը կողմերը ընդունել են որպես հիմք բանակցությունների համար: Դա 2007 թվականի մադրիդյան փաստաթուղթն է: Միջնորդների կողմից պարբերաբար ներկայացվում են աշխատանքային առաջարկներ, որոնք քանի դեռ համաձայնեցված չեն կողմերի հետ, չեն կարող փոխարինել մադրիդյան փաստաթղթին: Եթե Ադրբեջանը հերթական անգամ փորձ է կատարում հրաժարվելու մադրիդյան փաստաթղթից, ինչը նա անում էր մեկ տարուց ավելի՝ փաստաթուղթը ընդունելուց հետո, ապա թող հայտարարի դրա մասին»,- ասել է Շ. Քոչարյանն ու հավելել. «Կարգավորման համաձայնեցված սկզբունքներն են` ժողովուրդների ինքնորոշումը, տարածքային ամբողջականությունը և ուժի չկիրառումը: Մինչև ձեռք չբերվի համաձայնություն ԼՂ կարգավիճակի հարցում, անհնարին է ինքնորոշված ԼՂՀ-ի դեմ Ադրբեջանի կողմից իրականացված ագրեսիայի հետևանքների վերացումը: Եթե Ադրբեջանը իրոք ցանկանում է վերացնել իր իսկ ագրեսիայի հետևանքները, ապա նա պետք է պատրաստ լինի դուրս բերել զորքերը իր կողմից օկուպացված ԼՂՀ տարածքներից և ապահովել փախստականների վերադարձը: Ադրբեջանը շարունակում է աղավաղել միջազգային իրավունքը` հայտարարելով Ադրբեջանի տարածքային ամբողջականության շրջանակներում ԼՂ ժողովրդի ինքնորոշման մասին: Իրականում, խնդիրը կայանում է ԼՂ ժողովրդի ինքնորոշման և դրա դեմ ուժ կիրառած Ադրբեջանի պատասխանատվության շրջանակներում Ադրբեջանի տարածքային ամբողջականության մասին:
Համաձայն ՄԱԿ-ի կանոնադրության, ՄԱԿ-ի 4 նպատակներից մեկն է ժողովուրդների իրավահավասարության և ինքնորոշման հարգումը, իսկ տարածքային ամբողջականությունը ՄԱԿ-ի սկզբունքներից մեկն է այդ նպատակին հասնելու համար: Ադրբեջանը շարունակում է գործել, թե՛ ՄԱԿ-ի նպատակների, թե՛ ինքնորոշված ԼՂՀ-ի տարածքային ամբողջականության դեմ, ինչը հանդիսանում է հիմնական խոչընդոտը բանակցություններում առաջընթաց ապահովելու հարցում»: