Նախագահ Սերժ Սարգսյանը ցավակցական հեռագիր է հղել Լիբանանի Հանրապետության նախագահ Միշել Սուլեյմանին՝ օգոստոսի 15-ին Բեյրութում տեղի ունեցած զարհուրելի ահաբեկչական գործողության կապակցությամբ, որը տասնյակ անմեղ մարդկային զոհերի եւ հարյուրավոր վիրավորների պատճառ է դարձել:
Սերժ Սարգսյանը խորին ցավակցություն եւ զորակցություն է հայտնել Լիբանանի նախագահին, զոհվածների հարազատներին եւ Լիբանանի եղբայրական ժողովրդին` մաղթելով տոկունություն եւ ոգու արիություն, իսկ վիրավորներին՝ շուտափույթ ապաքինում:
Ինչպես ավելի վաղ հայտնել էր NEWS.am-ը, Բեյրութի շիական թաղամասում ականավորված ավտոմեքենայի պայթյունի հետեւանքով զոհերի թիվը հասել է 22-ի, եւս 325 մարդ վիրավորվել է:
Լիբանանի ՆԳՆ տվյալներով՝ ականավորված ավտոմեքենան պայթեցրել էր մահապարտ-ահաբեկիչը: Ավտոմեքենան պայթեցվել է այն ժամին, երբ քաղաքի այդ հատվածը հատկապես մարդաշատ է լինում: Ահաբեկչությունն ուղղված է եղել «Հըզբոլլահ» խմբավորման դեմ:
