Հայաստանը Հարավային Կովկասում ինտերնետից օգտվելու հարցում առաջատարն է՝ 44% ցուցանիշով: Այս մասին են վկայում «Հետազոտական ռեսուրսների կովկասյան կենտրոնի» տվյալները:
Ըստ այդ տվյալների՝ 2012թ. վերջի դրությամբ Հայաստանի բնակչության 44%-ն ինտերնետից օգտվել է շաբաթական մեկ անգամ կամ ավելի հաճախ:
2010թ. այս ցուցանիշը 28% էր: Ուշագրավ է, որ երկրում չեն մնացել մարդիկ, որոնք չգիտեն, թե ինչ է ինտերնետը:
Վրաստանում ամեն շաբաթ ինտերնետից օգտվում է բնակչության 35%-ը, ինտերնետի մասին չի լսել 6%-ը: Ադրբեջանում շաբաթը մեկ կամ ավելի հաճախ ինտերնետից օգտվում է բնակչության 19%-ը, 12%-ն էլ դեռ չգիտի՝ ինչ է ինտերնետը:
Հայերի մոտ 25%-ը ինտերնետով նորություններ են կարդում, Վրաստանում այս ցուցանիշը 22% է, Ադրբեջանում՝ 16%:
Կազմակերպությունը նշում է, որ ինտերնետից ամենաշատն օգտվում են մայրաքաղաքների 18-ից 35 տարեկան բնակիչները, հայտնում է Digit.ru-ն:
Նաեւ պարզվել է, որ Վրաստանի բնակչության մեծ մասը եւ հայերի ու ադրբեջանցիների գրեթե կեսը հիմնականում օգտվում են սոցցանցերից, ինչպիսիք են «Օդնոկլասնիկի»-ն, Facebook-ը եւ MySpace-ը: