Հայաստանի Հանրապետության կառավարությունն այսօր՝ հոկտեմբերի 3-ին որոշում ընդունեց շարունակել Արմավիրի մարզում կարկտահարությունից տուժածներին օգնության տրամադրումը:
ՀՀ աշխատանքի եւ սոցիալական հարցերի նախարարության ներկայացրած տեղեկանքով՝ դեռ օգոստոսին կառավարության հատկացրած 171.5 մլն դրամից մոտ 65 մլն դրամը չի օգտագործվել; Օգնություն են ստացել 478 հողօգտագործող: Ըստ ՀՀ աշխատանքի եւ սոցիալական հարցերի նախարար Արտեմ Ասատրյանի՝ գյուղացիներին տրամադրել են 50 հազարական դրամ օգնություն, մարդկանց ապահովել են աշխատանքով՝ 4 հազ. դրամ օրավարձով:
Ըստ նախարարի՝ ծրագիրը եղել է հաջողված:
«Դա ձեր գնահատականն է, իսկ ժողովրդի՞նը»,- հարցրեց վարչապետ Տ. Սարգսյանը:
«Ժողովրդի կողմից նույնպես դրական է գնահատվել»,- հավաստիացրեց աշխատանքի եւ սոցիալական հարցերի նախարարը՝ հղում անելով ուսումնասիրություններն ու հարցումները: Տ. Սարգսյանն առաջարկեց այդ ուսումնասիրությունները ներկայացնել լրատվամիջոցներին:
