Այսօր՝ հոկտեմբերի 15-ին Երեւանում ԵԱՀԿ աջակցությամբ կազմակերպվել է կլոր սեղան նվիրված ահաբեկիչների կողմից պայթուցիկների օգտագործման մատչելիության խոչընդոտման ավելի լավ վերահսկման խնդիրներին:
Միջոցառմանը մասնակցում են ՀՀ պետական հաստատությունների եւ մասնավոր հատվածի մոտ քսանհինգ փորձագետներ, որոնք Բելգիայի, Իսպանիայի, Միացյալ Թագավորության, ինչպես նաեւ ՄԱԿ-ի թմրանյութերի եւ հանցավորության հարցերով գրասենյակի փորձագետների հետ կկիսեն իրավական գործիքներով պայթուցիկները եւ պայթուցիկ բաղադրիչները ավելի լավ վերահսկելու վերաբերյալ իրենց փորձը: Միջոցառման հիմնական նպատակն է աջակցել ՀՀ-ին կիրառելու ահաբեկչության դեմ միջազգային իրավական դաշտը:
«Այս միջոցառումը նպատակ ունի օգնելու մասնակիցներին ավելի լավ հասկանալ, թե ինչ է անհրաժեշտ ահաբեկչական գործողությունները կանխելու համար», ասել է ԵԱՀԿ երեւանյան գրասենյակի ռազմաքաղաքական ծրագրերի ղեկավար Լիլիան Շալառուն եւ հավելել. «Մենք նաեւ կփորձենք տեսնել, թե ինչպես ԵԱՀԿ-ն՝ աշխատելով իր գործընկերների հետ, կկարողանա նպաստել առավել արդյունավետ ճանապարհով ազգային դաշտի եւ միջգերատեսչական կարողությունների կատարելագործմանը, որոնք ուղղված կլինեն ահաբեկչական սպառնալիքներին եւ ահաբեկչության դեմ համապատասխան միջազգային չափանիշները կիրառելուն»:
Նա ավելացրել է, որ ԵԱՀԿ Քարտուղարության Անդրազգային սպառնալիքների վարչությունը ԵԱՀԿ երեւանյան գրասենյակի հետ համատեղ կշարունակի աջակցել Հայաստանին արդյունավետորեն պայքարելու միջազգային ահաբեկչությունից բխող սպառնալիքների դեմ:
Քննարկումը իրականացվում է Գերմանիայի եւ Ավստրալիայի Կառավարությունների ֆինանսական աջակցությամբ: