Հայաստանը, Վրաստանը եւ Մոլդովան միացել են Արեւելյան գործընկերության էներգախնայողության եւ շրջակա միջավայրի ծրագրին (Eastern Europe Energy Efficiency and Environment Partnership, E5P), ասված է Եվրահանձնաժողովի հաղորդագրության մեջ:
Միաժամանակ դոնորների միջազգային հանրությունը վճռել է այդ գործընկերության ֆոնդը ավելացնել 70 միլիոն եվրոյով:
Դոնորներ են ԵՄ-ի երկրները, ինչպես նաեւ Իսլանդիան, Նորվեգիան, Ուկրաինան, ԱՄՆ-ն, այժմ նաեւ՝ Հայաստանը, Վրաստանը, Մոլդովան: Այնուհետեւ ներդրումները օգտագործվում են ազգային մակարդակների եւ միջազգային ֆինանսական կառույցների սխեմաներում միջոցներ ներգրավելու համար, մասնավորապես ՎԶԵԲ-ում, ԵՄԲ-ում, Համաշխարհային բանկի խմբում: Սկզբնապես 2009թ. առաջարկված ֆոնդի ուշադրության կենտրոնում եղել է Ուկրաինան:
«Հավելյալ ֆինանսավորումը մեզ հնարավորություն է տալիս սատարել Ուկրաինայի տեղական ինքնակառավարման մարմիններին՝ բնակչության համար կայուն եւ մատչելի ջեռուցում ապահովելու եւ ջրի որակը լավացնելու համար: Ես ուրախ եմ, որ Հայաստանը, Վրաստանը եւ Մոլդովան որոշել են միանալ գործընկերությանը», - ասել է եվրահանձնակատար Շտեֆան Ֆյուլեն:
ԵՀ-ն պատրաստ է այդ երեք երկրներին հատկացնել մինչեւ 30 միլիոն եվրո՝ քաղաքապետարանների էներգախնայողության ծրագրերի համաֆինանսավորման համար, հայտնում է «ՌԻԱ Նովոստին»:
Արեւելյան գործընկերության երկրները էներգետիկայի բնագավառում բարդ պայմանների են բախվում, կարծում է ԵՀ-ն: Նրանց մեծ մասը լուրջ կախում ունեն թանկ ներկրվող գազից: Միջին հաշվարկներով՝ նրանք երեք անգամ ավելի շատ էներգիա են ծախսում, քան ԵՄ-ի երկրները:
