Թուրքական մամուլում շարունակվում են հրապարակվել նյութեր տարածաշրջանում Թուրքիայի քաղաքականության դեմ դուրս եկած Իրանի գործողությունների մասին, որոնցում մեծ տեղ են հատկացնում Իրանի կողմից PKK-ին եւ նրա սիրիական թեւ PYD-ին աջակցելու մասին պնդումները։
Թուրքական Turkiye պարբերականի փոխանցմամբ՝ Իրանը վերջին շրջանում աշխատում է ավելացնել իր ազդեցությունը Հյուսիսային Իրաքում, Քանդիլում եւ Սիրիայի հյուսիսում եւ հանդես է գալիս Թուրքիայի քաղաքականության դեմ։
«Իրանը աջակցում է Թուրքիայի հետ լավ հարաբերություններ ունեցող Հյուսիսային Իրաքի քրդական ինքնավարության առաջնորդ Մեսուդ Բարզանիի հակառակորդներին եւ աշխատանքներ է տանում Իրաքի նախագահ Ջելալ Թալաբանիի կուսակցությունը՝ YNK-ն իր ազդեցության տակ վերցնել։
Թուրքիայի վերջին քայլերից հետո Իրանի հետախուզությունը սկսել է ավելացնել այցելությունները Քանդիլ (Հյուսիսային Իրաքում գտնվող PKK-ի ճամբարներ-խմբ)։ Անկարան եւ Բարզանին ցանկանում են, որ Սիրիայում քրդական PYD-ն շարժվի մյուս ընդդիմադիր կառույցների հետ, սակայն այս պահին PYD-ն Ասադի հետ համատեղ է շարժվում»,գրված է հրապարակման մեջ, որի վերջում ավելացվել է, թե Իրանի հետախուզությունը բազմաթիվ անգամ այցելել է PKK-ի ճամբարներ՝ խոստանալով ծանր զինտեխնիկա տրամադրել քրդերին, եթե նրանք դադարեցնեն Թուրքիայի հետ հաշտության բանակցությունները։