Եվրամիությունն ու Հայաստանը ցանկանում են շարունակել սերտ հարաբերությունները եւ առաջ շարժվել արդեն առկա ձեռքբերումների հիմքով: Այս մասին Հայաստան-Եվրամիություն համագործակցության խորհրդի նիստի ամփոփիչ ասուլիսում հայտարարել է ԵՄ ընդլայնման եւ եվրոպական հարեւանության հարցերով հանձնակատար Շտեֆան Ֆյուլեն:
Ըստ նրա՝ նախորդ նիստի համեմատ, անշուշտ, քննարկման բովանդակային տարբերություններ կային՝ հաշվի առնելով Հայաստանի նոր միջազգային պարտավորությունները: Սակայն կողմերի ցանկությունը եւ սերտ հարաբերությունները շարունակելն ու արդեն առկա ձեռքբերումների հիմքով առաջ շարժվելը նույնն է մնում:
«Այդ համատեքստում մենք վերահաստատել ենք մեր երկկողմ հարաբերությունների հիմքերը վերանայելու, ինչպես նաեւ Հայաստան-ԵՄ Եվրոպական հարեւանության քաղաքականության ուղղությամբ գործողությունների ծրագրի համալրման անհրաժեշտությունը, որպեսզի այն համապատասխանեցնենք ապագա համգործակցության ծավալին եւ հավակնություններին»,- հայտարարել է Ֆյուլեն:
Նա նաեւ նշել է Հայաստանի առաջընթացը վիզային ռեժիմի պարզեցման եւ հետընդունման համաձայնագրերը վավերացնելու գործընթացն ավարտին հասցնելու հարցում: «Մենք անհամբեր սպասում ենք դրանց շուտափույթ ուժի մեջ մտնելուն, որը մեզ հնարավորություն կտա ամրապնդել կապերը մեր հետագա համագործակցության կարեւոր բաղադրիչ հանդիսացող մարդկանց միջեւ»,- նշել է հանձնակատարը:
Ըստ նրա` ԵՄ-ն նաեւ ողջունում է Հայաստանի առաջընթացը բարեփոխումների հարցում եւ այդ ուղուն հավատարիմ մնալը շարունակելը, միաժամանակ կոչ է արել աշխուժացնել ջանքերը որոշակի բնագավառներում, մասնավորապես` ժողովրդավարության եւ օրենքի գերակայության, կոռուպցիայի դեմ պայքարի, մարդու իրավունքների եւ հիմնական ազատությունների, ինչպես նաեւ դատական համակարգի բարեփոխությունների:
«ԵՄ-ի եւ Հայաստանի միջեւ հարաբերությունների նոր համատեքստում առաջընթաց է նկատվում: Այժմ մենք պետք է աշխատանքի անցնենք` այն իրականություն դարձնելու համար: Հայաստանը կարող է հույսը դնել ԵՄ-ի շարունակական աջակցության վրա` քաղաքական, տնտեսական եւ սոցիալական բարեփոխությունների եւ մարդու իրավունքների ու հիմնական ազատություների պաշտպանության առաջխաղացման հարցերում: Մենք ուժեղացրել ենք քաղաքացիական հասարակության համագործակցությունը եւ աջակցությունը: Մենք հուսով ենք, որ նրանց աշխատանքը եւս կկառուցվի վերջին 3,5 տարվա ընթացքում այդ բնագավառում ձեռքբերվածի հիման վրա: Մենք հուսով ենք, որ հիմնական ազատությունները, մասնավորապես` խոսքի եւ հավաքների ազատությունը, հետագայում էլ կամրապնդվի»- հայտարարել է Ֆյուլեն:
Եվրահանձնակատարն ընդգծել է, որ աջակցություն կտրամադրվի Արեւելյան գործընկերության Քաղաքացիական հասարակության ֆորումի հայ ազգային հարթակին` իր դերն ամրապնդելու եւ բարեփոխությունների գործընթացի մոնիտորինգ իրականացնելու նպատակով, կառավարության հետ կառուցողական երկխոսության ճանապարհով: «Մենք կառավարությանը կոչ ենք անում երաշխավորել, որպեսզի հալածանքներ չլինեն քաղաքացիական հասարակության ներկայացուցիչների, իրավապաշտպանների, կանանց իրավունքների համար պայքարողների նկատմամբ: Մենք Հայաստանին նաեւ կոչ ենք արել քննել անցյալի որոշ դեպքեր եւ հավաստիանալ, որ մեղավորները պատասխանատվության կենթարկվեն», - ասել է դիվանագետը: