Հայ դիրիժոր Արամ Ղարաբեկյանին կհուղարկավորեն Հայաստանում։ Այս մասին NEWS.am-ի թղթակցին հայտնեցին Մշակույթի նախարարության լրատվական ծառայությունից։ Նրանց փոխանցմամբ՝ այժմ ընտանիքը համապատասխան փաստաթղթերն է դասավորում, որպեսզի նրա դին ԱՄՆ-ից տեղափոխվի Հայաստան։ Իսկ թե երբ կտեղափոխվի, դեռ հայտնի չէ, թերեւս մինչեւ շաբաթվա վերջ։ Հայտնի հայ դիրիժորի մահվան առթիվ կկազմվի թաղման կառավարական հանձնաժողով, որը ղեկավարելու է Մշակույթի նախարար Հասմիկ Պողոսյանը։
Հիշեցնենք, որ հունվարի 11-ին, 58 տարեկան հասակում մահացել էր անվանի հայ դիրիժոր Արամ Ղարաբեկյանը: Նա հանկարծամահ էր եղել Միացյալ Նահանգներում:
Արամ Ղարաբեկյանը ծնվել էր 1955թ. հուլիսի 7-ին, Բոստոնում: Սովորել է Բոստոնի «
1983թ. հիմնել է Բոստոնի «Սինֆոնովա» նվագախումբը, որը ղեկավարել է մինչ 1991թ.: Աշխատել է Կիեւի ռադիո եւ հեռուստատեսության սիմֆոնիկ նվագախմբի հետ եւ միասին թողարկել է «Ռոմեո եւ Ջուլիետ» սկավառակը, որից հետո Ուկրաինայի մշակույթի նախարարը դիրիժորին նշանակել է իր գլխավոր խորհրդական: Ղեկավարել է նաեւ Ուկրաինայի ազգային սիմֆոնիկ նվագախումբը ու Օպերայի եւ բալետի թատրոնը: Աշխատել է նաեւ Զագրեբի սիմֆոնիկ նվագախմբի հետ` որպես հրավիրված դիրիժոր: Հետագայում ղեկավարել է մի շարք նվագախմբեր` Հայաստանի եւ Ֆրեզնոյի ֆիլհարմոնիկ, Շրեվեպորտի, Հանգչջոուի եւ Զեջիանգի սիմֆոնիկ:
1999թ. ամանորի նախաշեմին 6 տարբեր երկրներից կազմված նվագախմբով հանդես է եկել նոր հազարամյակին նվիրված համերգային ծրագրով, Չինաստանի Հանչժոու քաղաքում, որտեղ ներկայացրել է Բեթհովենի 9-րդ սիմֆոնիան:
1988թ. արժանացել է ամերիկյան կոմպոզիտորների, հեղինակների եւ խմբագիրների (ASCAP) մրցանակին, 1989թ.` Լյուսիեն Վուլսինի մրցանակին: Արժանացել է նաեւ Հարվարդի ասոցիացիայի երաժշտական մրցանակին, 2007թ.` ՀՀ արվեստի վաստակավոր գործչի կոչմանը: