Անցյալ գիշեր Ադրբեջանից երկու դիվերսիոն խմբերի ներթափանցումը Լեռնային Ղարաբաղի տարածք կայունության կոպիտ խախտում է: Այդ մասին հայտարարել է Լեռնային Ղարաբաղի նախագահի մամուլի քարտուղար Դավիթ Բաբայանը NEWS.am-ի թղթակցի հետ զրույցում:
«Միջազգային իրավունքի նորմերի այդ հանդուգն խախտումը նվազագույնին է հասցնում ադրբեջանա-ղարաբաղյան հակամարտության կարգավորման՝ ԵԱՀԿ Մինսկի խմբի համանախագահների ջանքերը»,- հայտարարել է Դավիդ Բաբայանը:
Նրա խոսքով՝ այդ գործողություններով Ադրբեջանը ցուցադրում է իր ֆաշիստական էությունն ու անկանխատեսելիությունը:
«Ինչ վերաբերում է դիվերսիային, կրկնում եմ, մենք միշտ պատրաստ ենք հակահարված տալ նման ոտնձգություններին: Նման սադրանքները մենք միշտ խափանել ենք, խափանում ենք ու կխափանենք»,- ընդգծել է Դավիթ Բաբայանը:
