Հունվարի 23-ի նիստում ՀՀ կառավարությունը հաստատել է Մաքսային միությանը եւ Բելառուսի Հանրապետության, Ղազախստանի Հանրապետության եւ Ռուսաստանի Դաշնության միասնական տնտեսական տարածքին Հայաստանի Հանրապետության անդամակցության նպատակով միջոցառումների ծրագրի (ճանապարհային քարտեզ) իրականացմանն ուղղված գործողությունների ժամանակացույցը:
Վարչապետ Տիգրան Սարգսյանը հայտարարել է, որ հարցը մասամբ վերաբերում է համապատասխան փաստաթղթերի հետ խմբագրական աշխատանքին:
«Այս հարցը քննարկել ենք երեկվա նիստում: Շատ կարեւոր է, որպեսզի տեքստերի բոլոր թարգմանություններ առավելագույնս ճշգրիտ լինեն, քանի որ այդ փաստաթղթերում առկա եզրույթները մենք հիմք կընդունենք հետագա աշխատանքի համար: Այս հարցի վրա եմ ուզում հրավիրել արդարադատության եւ էկոնոմիկայի նախարարների ուշադրությունը», – հայտարարել է վարչապետը:
Հիշեցնենք, Հայաստանի Մաքսային միություն մտնելու «ճանապարհային քարտեզը» ստորագրվել էր 2013թ. Մոսկվայում կայացած Եվրասիական տնտեսական բարձագույն խորհրդի նիստում: Արդեն հաղորդվել է, որ անդամակցության նախապատրաստական աշխատանքները կավարտվեն մինչեւ 2014թ. մայիսը:
