Հայաստանի արտգործնախարար Էդվարդ Նալբանդյանը Փարիզում կայացած հանդիպմանը ԵԱՀԿ Մինսկի խմբի համանախագահների ուշադրություն է հրավիրել Ադրբեջանի կողմից Հայաստանի հետ սահմանին եւ Արցախի հետ շփման գծում լարվածության շեշտակի մեծացման եւ հրադադարի ռեժիմի կոպիտ խախտումների, Արդբեջանում ամենաբարձր մակարդակով հնչեցվող ռազմատենչ եւ Հայաստանի նկատամամբ տարածքային նկրտումներ պարունակող հայտարարությունների վրա, որոնք ակնհայտ սադրիչ բնույթ են կրում եւ լուրջ հարված են հասցնում բանակցային գործընթացին:
ԱԳՆ մամուլի ծառայությունից հայտնում են, թե Էդվարդ Նալբանդյանն ընդգծել է, որ դրանք նվազեցնում են հիմնախնդրի կարգավորման եւ խաղաղության հասնելու հեռանկարները եւ ակնհայտ արհամարհանք են եռանախագահ երկրների ղեկավարների կողմից բազմիցս արված կոչերին` ձեռնպահ մնալու հայտարարությւններից եւ գործողություններից, որոնք կարող են ավելացնել լարվածությունը տարածենաշրջանում եւ հանգեցնել իրավիճակի էսկալացիայի:
Այս համատեքստում Հայաստանի արտգործնախարարը կարեւորել է ԵԱՀԿ Մինսկի խմբի համանախագահների`հրադադարի ռեժիմի ամրապնդմանն ուղղված նախաձեռնությունների կյանքի կոչումը՝ որպես սադրանքների կանխարգելման հնարավոր մեխանիզմ:
Ինչպես ավելի վաղ հայտնել էր NEWS.am-ը, հունվարի 24-ին Փարիզում տեղի է ունեցել Հայաստանի արտգործնախարար Էդվարդ Նալբանդյանի, Ադրբեջանի արտգործնախարար Էլմար Մամադյարովի, ԵԱՀԿ Մինսկի խմբի համանախագահներ Իգոր Պոպովի, Ժակ Ֆորի, Ջեյմս Ուորլիքի եւ ԵԱՀԿ գործող նախագահի անձնական ներկայացուցիչ Անջեյ Կասպրչիկի հանդիպումը:
Հայաստանի եւ Ադրբեջանի արտգործնախարարները սկզբում առանձին հանդիպումներ են ունեցել ԵԱՀԿ Մինսկի խմբի համախագահների հետ, ապա բանակցությունները շարունակվել են ընդլայնված ձեւաչափով` արտգործնախարարների, Մինսկի խմբի համանախագահների եւ ԵԱՀԿ գործող նախագահի անձնական ներկայացուցչի մասնակցությամբ։ Քննարկվել են խաղաղ կարգավորման գործընթացն առաջ մղելու նպատակով ձեռնարկվելիք քայլերը:
Պայմանավորվածություն է ձեռք բերվել հաջորդ ամսվա առաջին կեսին ԵԱՀԿ Մինսկի խմբի համանախագահների` տարածաշրջան այցելելու վերաբերյալ:
