Միացյալ Նահանգների ամենախոշոր քաղաքներից մեկի՝ Լոս Անջելեսի քաղաքային խորհուրդը միաձայն ընդունել է բանաձեւ, որով ճանաչել է Լեռնային Ղարաբաղի Հանրապետությունը որպես անկախ եւ ինքնիշխան պետություն՝ միաժամանակ կոչ անելով միջազգային հանրությանն արժանավույնս ճանաչել Լեռնային Ղարաբաղի Հանրապետությունը որպես ազատ, անկախ եւ ինքնիշխան պետություն:
Խորհրդի անդամները իրենց ընդունած բանաձեւում նշում են, որ Լեռնային Ղարաբաղի Հանրապետությունը նպաստում է Կովկասի տարածաշրջանի կայունությանը՝ անցկացնելով ազատ եւ արդար ընտրություններ: Բանաձեւում անդրադարձ է կատարվում Լեռնային Ղարաբաղի ինքնորոշման համար մղված պայքարին, որը ոգեշնչեց նաեւ տարածաշրջանի շատ ժողովուրդների:
Բանաձեւն ներկայացրել է Լոս Անջելեսի խորհրդի հայազգի անդամ Պոլ Գրիգորյանը: Բանաձեւը գալիս է լրացնելու Ռոդ Այլենդում, Մասաչուսեթսում, Մեյնում, Լուիզիանայում, Մերիլենդում, Ֆրեզնոյում եւ այլուր ընդունված նմանօրինակ բանաձեւերի եւ հռչակագրերի շարքը:
