Վանի Բաշքալեի շրջանում գտնվող եւ 1915-ից հետո լքված հայկական Սուրբ Բարդուղիմեոս եկեղեցին թուրքական իշխանությունները նախատեսում են վերանորոգել։

Թուրքական Anadolu գործակալության հետ զրույցում Թուրքիայի մշակույթի եւ տուրիզմի նախարարության Վանի նահանգային վարչության պետ Մուզաֆեր Աքթուղը նշել է, թե եկեղեցին հոգեւոր տուրիզմի համար ծառայեցնելու համար վերակառուցման նախագիծը հանձնել են Մշակույթի եւ տուրիզմի նախարարություն։

Թուրք պաշտոնյան նշել է, թե նախարարության կողմից ծրագրի հաստատումից հետո սկսվելու է եկեղեցու վերանորոգումը։

Նշենք, որ հարցազրույցում բացակայում է հայկական եկեղեցի արտահայտությունը։

Հիշեցնենք, որ երկար տարիներ եկեղեցին եղել է զորամասի տարածքում եւ միայն 2013-ին զորամասի տեղափոխությունից հետո հնարավոր է եղել այցելել եկեղեցի։

Ըստ ավանդության, Սուրբ Բարդուղիմեոս եկեղեցին Բարդուղիմեոս առաքյալի գերեզմանի վրա  կառուցել է Սանատրուկ թագավորը։