Սերժ Սարգսյանի այցը Չեխիա, որը ԵՄ-ի եւ ՆԱՏՕ-ի շրջանակում բավական ազդեցիկ երկիր է, Հայաստանի համար կարեւոր էր Երեւանի եւ Բրյուսելի միջեւ նոր իրավիճակում համագործակցության ձեւաչափի ստեղծման համատեքստում: Այս մասին փետրվարի 6-ի մամուլի ասուլիսում հայտարարել է Կովկասի ինստիտուտի փոխտնօրեն, քաղաքագետ Սերգեյ Մինասյանը:
Նա նշել է, որ Սերժ Սարգսյանի հարցազրույցից եւ այլ գործընթացներից կարելի էր եզրակացնել, որ մենք գործ ունենք ՄՄ-ին եւ ԵՄ-ին վերաբերող զուգահեռ գործընթացների հետ: «Հայաստանը պարզ պատկերացում չունի ԵՄ-ի հետ հարաբերությունների ձեւաչափի մասին, որոշակիություն չկա նաեւ ՄՄ-ին անդամակցության ժամկետների եւ պայմանների վերաբերյալ: Կախված այն բանից, թե ինչպիսի առաջընթաց կլինի ՄՄ-ի շրջանակում, տեղի կունենան նաեւ ԵՄ-ի գործընթացները», - հավելել է Մինասյանը:
Ըստ քաղաքագետի՝ մի կողմից դա Հայաստանի համար դժվարացնում է մանեւրելու հնարավորությունը, սակայն մյուս կողմից էլ այդ երկու ձեւաչափերում հնարավոր կլինի գտնել մի ուղի, որի բացասական ազդեցությունը Հայաստանի ներքաղաքական եւ սոցիալ-տնտեսական կյանքի վրա նվազագույն կլինի:
«Միաժամանակ վերջին շաբաթներին տեղի ունեցող գործընթացները Երեւանի համար այս տարի կարող են հետաքրքիր իրավիճակի հանգեցնել անվտանգության բնագավառում: Դա կապված է Հայաստանի ռազմատեխնիկական համագործակցության նոր ծավալի հետ, եւ այն կանդրադառնա նաեւ տարածաշրջանում ռազմական քաղաքականության վրա», - նշել է Սերգեյ Մինասյանը:
Լուսանկարը՝ Արսեն Սարգսյանի / NEWS.am
