«Էյ-Ի-Ջի Սերվիս» ՍՊԸ-ի կողմից Գազի անվտանգության կանոնների վերաբերյալ իրազեկման հերթական դասընթացն անցկացվել Երեւանի Անդրանիկ Մարգարյանի անվան թիվ 29 ավագ դպրոցում:
Դասընթացավարները երեխաներին ներկայացրել են կենցաղում բնական գազից անվտանգ օգտվելու, գազային ջրատաքացուցիչների, գազի կաթսաների եւ գազօջախների շահագործման կանոնների կիրառումը, ինչպես նաեւ գազի արտահոսքի հիմնական պատճառներն ու դրանց կանխարգելման միջոցառումները: Դասընթացներն առավել արդյունավետ եւ պատկերավոր դարձնելու համար նյութը մատուցվել է նկարազարդ պաստառների միջոցով, ցուցադրվել է նաեւ «Բնական գազի գաղտնիքները» մուլտիպլիկացիոն տեսաշարը:
Դասընթացից հետո աշակերտներին տրվել են հարցաթերթիկներ` ստուգելու, թե որքանով է յուրացվել մատուցված նյութը: Արդյունքները եղել են բավականին գոհացուցիչ, ինչի համար աշակերտներից շատերին շնորհվել են «Էյ-Ի-Ջի Սերվիս» ՍՊԸ-ի կողմից «Ներտնային անվտանգության գործակալի» կոչումով վկայագրեր:
Դպրոցի տնօրեն Ռուզաննա Սարուխանյանը «Էյ-Ի-Ջի Սերվիս» ՍՊԸ-ի կողմից պարգեւատրվել է պատվոգրով` դասընթացների կազմակերպմանն աջակցելու համար: Նրա խոսքով ոչ միայն օգտակար են նմանատիպ դասընթացները, այլեւ անհրաժեշտ, քանի որ դպրոցը երեխաներին պետք է ոչ միայն գիտելիքներ տա, այլ նաեւ կենցաղում վարվելու կանոնների իմացություն:
«Էյ-Ի-Ջի Սերվիս» ՍՊԸ-ի կողմից նախաձեռնությունը շարունակական բնույթ է կրելու եւ դասընթացներ են կազմակերպվելու մի շարք այլ դպրոցներում նույնպես:
