2013 թ.-ի դեկտեմբեր-2014 թ.-ի հունվար ամիսներին հայտարարված զորակոչը եւս ուղեկցվել է առողջական խնդիրներ ունեցող երիտասարդների զորակոչման արատավոր գործելակերպով։ Այս մասին հայտարարություն է տարածել ՀՔԱ Վանաձորի գրասենյակը:
Հայտարարությունում ասվում է.
«Արձանագրվեցին բազմաթիվ խախտումներ, մասնավորապես.
§ բժշկական հանձնաժողովներում բուժզննություն անցնող զորակոչիկներին եւ նրանց հարազատներին առավոտից մինչ ուշ երեկո դրսում ցրտին սպասեցրել են,
§ զորակոչվել են քաղաքացիներ, որոնք ունեն լուրջ առողջական խնդիրներ,
§ դեռեւս միայն մի քանի օր ծառայության մեջ գտնվող զինծառայողները եւ նրանց հարազատները ահազանգում են, որ առողջական խնդիրներ ունեցող զորակոչված զինծառայողներից ոմանք` դեռեւս ծառայության չանցած, տեղափոխվել են հոսպիտալ:
ՀՔԱ Վանաձորի գրասենյակը հերթական անգամ փաստում եւ արձանագրում է, որ պաշտպանական գերատեսչությունը զորակոչի կազմակերպման եւ իրականացման ընթացքում համարժեք ուշադրություն չի դարձնում զորակոչիկների առողջական խնդիրներին։ Շարունակվում է ձեւական եւ մակերեսային մոտեցմամբ բժշկական հետազոտության իրականացման գործելակերպը՝ նպատակ ունենալով ձեւական հիմնավորումներով երիտասարդներին ճանաչել պիտանի զինծառայությանը, ենթարկել զորակոչի եւ այդ կերպ համալրել զինված ուժերը:
ՀՔԱ Վանաձորի գրասենյակը հերթական անգամ
§ ահազանգում է նման մոտեցման անթույլատրելիության մասին, խստորեն դատապարտում է պաշտպանության գերատեսչության կողմից զորակոչի կազմակերպման եւ իրականացման նման գործելակերպը,
§ պահանջում է անհապաղ դադարեցնել ձեւական, զուտ փաստաթղթային մակարդակում իրականացվող բժշկական հետազոտման իրականացումը,
§ պահանջում է իրականացնել պատշաճ բուժզննություն, եւ անդրադառնալ հատկապես մի քանի հիվանդություններ ունեցող զորակոչիկների՝ զինծառայությանը պիտանի լինելու հարցին եւ տրամադրել տարկետում կամ ազատել զինծառայությունից:
Վերստին պնդում ենք, որ առողջական խնդիրներ ունեցող, թեկուզ սահմանափակումներով ծառայությանը պիտանի ճանաչված յուրաքանչյուր երիտասարդի զորակոչումը հանգեցնում է զինծառայությանը բնորոշ ավելի խիստ պայմաններում զորակոչված երիտասարդի առողջության վատթարացմանը եւ հանդիսանում է անձի արժանապատվությունը նվաստացնող վերաբերմունք։
Նման պայմաններում անխուսափելի են առողջական խնդիրների հետեւանքով կանոնադրական հարաբերությունների խախտման, ընդհուպ մինչեւ մահացության դեպքերը, որոնցով նույնիսկ քրեական գործերի հարուցումը չի կարող համարվել Հայաստանի Հանրապետության կողմից իր քաղաքացիների առջեւ մարդու իրավունքների պաշտպանության վերցրած պարտականությունների համարժեք ապահովում։
Հերթական անգամ, հայտարարելով, որ թե՛ զորակոչի, թե՛ զինծառայության ընթացքում, առողջական խնդիրների հետեւանքով զինակոչիկների եւ զինծառայողների իրավունքների խախտման անմիջական պատասխանատվությունը կրում է ՀՀ պաշտպանության նախարարությունը եւ ՀՀ Զինված ուժերի գլխավոր շտաբը, պահանջում ենք դադարեցնել արատավոր գործելակերպը»:
