Ռուսաստանում բենզինի գինը այս տարի կարող է 10 տոկոսով աճել՝ լիտրի համար միջինը 2-3 ռուբլով, կարծում են ՌԴ նավթագազարդյունաբերողների միությունում: Ոլորտային միավորումը հանդես է եկել չունեւոր քաղաքացիների համար սոցիալական լցակայաններ ստեղծելու նախաձեռնությամբ, որտեղ վառելիքը մեկ երրորդով էժան կլինի:
Ըստ միության նախագահ Գենադի Շմալի` աշխարհի կեսն արդեն կարգավորում է բենզինի գները ներքին շուկայում, եւ Ռուսաստանը նույնպես պետք է մտածի այդ բնագավառում իր գնային քաղաքականության մասին:
Վառելիքի անխուսափելի թանկացման պայմաններում միությունում տրամաբանական են համարում բենզինի սպառման նորմա ներմուծելը, ըստ որի` բենզինը քաղաքացիներին կվաճառվի շուկայական գներով: Առաջարկվում է նաեւ ստեղծել սոցիալական լիցքավորման կայաններ՝ չունեւոր քաղաքացիների համար եւ տալ վառելիքի կտրոններ, հայտնում է «Ռոսիյսկայա գազետան»:
Ինչ վերաբերում է բենզինի գներին, ապա, ըստ փորձագետների, դրանք աճում են պետական սակագնային քաղաքականության բացակայության պատճառով: Ըստ նավթարդյունաբերողների միության` հարկերը եւ ակցիզներն այժմ կազմում են բենզինի արժեքի 60 տոկոսը: Արտադրողներն իրենց ծախսերը գցում են սպառողների վրա:
