«Հայազն» կուսակցությունը խստագույնս դատապարտում է Հայաստանի բնական ռեսուրսների շահագործման իրավունքը հերթական անգամ օտարին հանձնելու փաստը:
Կուսակցության վարչության տարածած հայտարարության մեջ ասվում է. «Համոզված ենք, որ «Որոտան» ՀԷԿ-ի վաճառքը պայմանավորված է սեփական անփառունակ իշխանությանը գոնե փոքր ինչ արտաքին, այս դեպքում ամերիկյան աջակցություն ապահովելու ցանկությամբ: Էապես ցածր գինն էլ հուշում է, որ գործ ունենք վաղուց սնանկ կառավարության ստվերային մեծ շահերի եւ հանրային ունեցվածքի թալանի հերթական դրսեւորման հետ:
Հերթական հանցավոր գործարքը արդարացվող բոլոր մասնագիտական եւ քաղաքական հիմնավորումները ուղղակի ծիծաղելի են եւ մերժելի:
Դատապարտելի ենք համարում նաեւ այն քաղաքական դիրքորոշումները, որոնք տարբերակված են մոտենում հանրային ունեցվածքի թալանի փաստերին` կախված իրենց արտաքին կողմնորոշումներից:
Ազգային հեղափոխության առաջնահերթ խնդիրներից է լինելու վերականգնել բնական պաշարների եւ դրանց շահագործման ազգային բացարձակ մենաշնորհը, այդ թվում այս սկզբունքի խախտմամբ կնքված բոլոր պայմանագրերի լուծարման միջոցով»:
