Գարնան առաջին օրերին, ավանդույթի համաձայն, Երեւանում Ճապոնիայի օրեր են անցկացվում, որոնց շրջանակում այս տարի կիմոնոյի շոու կանցկացվի, թեյախմություններ, իկեբանեի եւ սումի-ե-ի վարպետաց դասեր: Այս մասին NEWS.am-ի թղթակցին հայտնել է «Հիկարի» կենտրոնի ղեկավար Կարինե Փիլիպոսյանը:
Բացումը կկայանա մարտի 1-ին, ժ. 18-ին՝ Նկարիչների միությունում: Բացումից անմիջապես հետո թեյախմություն կկազմակերպվի:
Մարտի 2-ի երեկոյան ճապոնական մշակույթի սիրահարները Երեւանում առաջին անգամ կիմոնոյի շոու կտեսնեն, որը կկայանա Նկարիչների միությունում:
Մարտի 3-ի առավոտյան «Հիկարիում» սումի-ե-ի վարպետաց դաս կանցկացվի, որը կվարի սենսեյ Յամադա Միդորին: «Հատկանշական է նաեւ, որ մարտի 3-ը աղջիկների տոնն է՝ հինա-մացուրին», - նշել է Կարինե Փիլիպոսյանը:
Հինա-մացուրին փոքրիկ աղջիկների տոնն է: Աղջիկ ունեցող ընտանիքները տիկնիկների ցուցադրություն են կազմակերպում, որոնք հաճախ մեծ արժեք են ներկայացնում: Աղջիկները կիմոնո են հագնում եւ միմյանց տուն հյուր գնում:
Սումի-ե-ն տուշով արված նկար է, այն նաեւ կոչվում է սույբոկուգա (ջրով եւ տուշով նկար): Այն սեւ-սպիտակ գեղարվեստ է, որը Ճապոնիայում հայտնվել է 13-րդ դարում: