ԱՄՆ-ի նախկին նախագահ Ջորջ Բուշ կրտսերը, ով վերջերս լրջորեն տարվել էր գեղարվեստով, այժմ էլ որոշել է սեփական նկարների ցուցահանդես կազմակերպել:
Այն կբացվի ապրիլի սկզբին Դալլասում ՝ Ջորջ Բուշ կրտսերի անվան նախագահական կենտրոնում:
«Լիդերության արվեստը. Նախագահի անձնական դիվանագիտությունը» անունով ցուցահանդեսում 20-ից ավելի դիմանկարներ կլինեն՝ նկարված ԱՄՆ-ի 43-րդ նախագահի ձեռքով, հայտնում է ԻՏԱՌ-ՏԱՍՍ-ը:
Բացի այդ, այցելուների դատին կներկայացվեն լուսանկարներ եւ անձնական գրառումներ, որոնք պատմում են Սպիտակ տան նախկին ղեկավարի եւ համաշխարհային այլ առաջնորդների հարաբերությունների մասին:
Ջորջ Բուշ կրտսերը գեղարվեստով տարվել է 2009թ.-ից՝ նախագահի պաշտոնը լքելուց հետո: Նա հիմնականում կենդանիներ է նկարում, նատյուրմորտներ, նաեւ՝ ինքնադիմանկարներ: Նախորդ տարեվերջին տեղեկություն էր տարածվել, թե Բուշը մտադիր է նկարահանել համաշխարհային 19 առաջնորդների դիմանկարները, առաջին հերթին՝ Գերմանիայի կանցլեր Անգելա Մերկելի:
Ըստ նախկին նախագահի՝ գեղարվեստի հանդեպ սերն իր մեջ արթնացել է Մեծ Բրիտանիայի նախկին վարչապետ Ուինսթոն Չերչիլի «Գեղարվեստը՝ որպես ժամանց» գիրքն ընթերցելուց հետո:
Դեկտեմբերին ԱՄՆ-ում Բուշի կողմից պատրաստված տոնածառի խաղալիք էր վաճառքի հանվել, որն իրենից ներկայացնում էր մետաղական շրջանակ՝ ներսում ճյուղի վրա նստած ոչ մեծ թռչնակի՝ կարմիր կարդինալի պատկերով: Խաղալիքը մեծ պահանջարկ էր վայելում:
