«Ուկրֆերի» ուկրաինական ընկերության նավերը շարունակում են Ուկրաինայի նավահանգիստներից վրացական նավահանգիստներ մեկնել բնականոն ռեժիմով: Այս մասին NEWS.am-ին հայտնել է ընկերության մամուլի քարտուղար Ալեքսանդր Ֆեոդորովը:
Նա նշել է, որ Կերչ-Փոթի երթուղին գործում է ոչ պարբերաբար, սակայն Ղրիմի իրադարձությունների հետ դա կապ չունի: «Պարբերական փոխադրումները չեղարկվել են, սակայն իրադարձությունների հետ դա ոչ մի կապ չունի: Պարզապես այժմ մենք փոխադրումներ իրականացնում ենք բեռների առկայության դեպքում: Ոչ մի դժվարություն չի ծագում», - նշել է Ֆեոդորովը:
Ընկերության մյուս գիծը` Իլիչեւսկից Բաթում /Փոթի եւ հակառակը, շարունակում է աշխատել շաբաթը երկու անգամ` նույնպես առանց դժվարությունների:
Նշենք, որ Ուկրաինայի նավահանգիստներից Վրաստանով Հայաստան են ժամանում Ուկրաինայից ներմուծվող ապրանքները, իսկ Կերչից երբեմն ռուսական ցորեն է ներմուծվում: