«Ազգային ինքնորոշում միավորման» նախագահ, «Իզմիրլյան» բժշկական կենտրոնում գտնվող Պարույր Հայրիկյանը դուրս է գրվել հիվանդանոցից: Այս մասին NEWS.am-ի թղթակցի հետ զրույցում ասաց ԱԻՄ առաջնորդը:
Նա նշեց, որ հիվանդանոցից դուրս է գրվել, բայց այդքան էլ լավ չի զգում իրեն, տեւական բուժում է հարկավոր: Պարույր Հայրիկյանը պետք է անընդհատ գնա հիվանդանոց, բուժումներ ընդունի եւ բժիշկների հսկողության տակ լինի:
Նա հույս ունի, որ նորից վիրահատության անհրաժեշտություն չի առաջանա, քանի որ մեկ տարվա մեջ արդեն 3 անգամ հասցրել է վիրահատվել:
Հարցին, թե հնարավոր է արտերկրում բուժումը շարունակի, ԱԻՄ առաջնորդն ասաց, որ պետք է գնար Բելգիա՝ նախորդ տարի կատարված վիրահատության հետեւանքով հետազոտման, սակայն առողջական վիճակից ելնելով՝ չի կարող ինքնաթիռ նստել:
Նշենք, որ «Ազգային ինքնորոշում միավորման» նախագահ Պարույր Հայրիկյանը մարտի 2-ին, տեղափոխվել է «Իզմիրյան» բժշկական կենտրոն եւ անմիջապես վիրահատվել հայտնաբերված պարապրոկտիտի (ուղիղ աղիքը շրջապատող բջջանքի բորբոքում) կապակցությամբ:
Կապ ունի այս բարդացումը 2013թ հունվարի 31-ին իր դեմ կատարված մահափորձի հետ, թե ոչ, բժիշկները միանշանակ չեն կարող ասել: «Տարբեր կարծիքներ կան, մեծ քանակությամբ հակաբորբոքային դեղամիջոցներ որ օգտագործել եմ, ասում են՝ դա կարող է նպաստել»,- ասել է ԱԻՄ առաջնորդը:
