Հայաստանի անդամակցումը Միասնական մաքսային միությանը, կօգնի հայ սերբական փոխադարձ առեւտրին: NEWS.am-ի թղթակցի հետ զրույցում նման տեսակետ է հայտնել Սերբիայի առեւտրա-արդյունաբերական պալատի ավագ խորհրդական Դեյան Դելիչը, որը Երեւան է այցելել մասնակցելու առաջին հայ-սերբական գործարար համաժողովին:
Պատճառն այն է, որ Սերբիան արդեն ազատ առեւտրի մասին համաձայնագիր ունի ՄՄ-ի երկրների հետ, հիշեցրել է Դելիչը:
Նա նշել է երկկողմ հարկերի վերաբերյալ համաձայնագրի կարեւորությունը, որը կնքվել է մարտի 10-ին, Սերբիայի պաշտոնական պատվիրակության Երեւան այցի ժամանակ:
«Կարծում եմ, որ ազատ առեւտրի ռեժիմը ձեռնտու կլինի երկու կողմերին: Եթե Հայաստանն ընդգրկվի Մաքսային միության կազմում, մենք այդպիսի ռեժիմ կստանանք ավտոմատ կերպով: Մեր տվյալներով՝ դա տեղի կունենա բավական շուտ»,-ասել է Դելիչը:
Նա հիշեցրել է, որ Սերբիան արդեն ազատ առեւտրի մասին համաձայնագիր ունի ԵՄ-ի, CEFTA երկրների (Բալկաններ, Ալբանիա, Մոլդովա) եւ Թուրքիայի հետ, որոնք ԵՄ-ի հետ միասնական մաքսային տարածքում են:
