Ռուսաստանը կարող է Ղրիմ ուղարկել Սոչիում տեղադրված շարժական գազատուրբինային էլեկտրակայանները, որպեսզի երաշխավորի թերակղզին, եթե Կիեւը որոշի սահմանափակել վերջինիս էլեկտրամատակարարումը: Այս մասին հաղորդում է «Կոմերսանտը»՝ վկայակոչելով էներգետիկ ու տրանսպորտային շուկաների աղբյուրը:
Ինչպես նշվում է, այդ կայանները պետք է անջատվեն մարտի 16-ին Պարալիմպիական խաղերի ավարտից հետո: Գործակալության մեկ այլ աղբյուր հաղորդում է, որ կայանները կտեղափոխվեն մինչեւ մարտի 16-ը՝ «հասցնելու կայանալիք հանրաքվեին»:
Հարկ է նշել, որ այս տեղեկատվությունն առայժմ պաշտոնապես չի հաստատվել:
Ավելի վաղ հաղորդվում էր, որ ռուս մասնագետները մշակում են Ղրիմի էներգաապահովման տարբերակներ, եթե Ուկրաինան որոշի դադարեցնել թերակղզու էլեկտրամատակարարումը:
Շարժական էլեկտրակայաններ օգտագործվում են որպես պահեստային հզորությունների աղբյուր եւ էլեկտրամատակարարման խափանումներին արագ արձագանքելու միջոց:
2013-ի դեկտեմբերին 202,5 ՄՎտ ընդհանուր հզորությամբ 9 էլեկտրակայաններ, որոնք պատկանում են «Ռոսցանցեր»-ին, տեղադրվել են Սոչիում՝ Օլիմպիադիայի ժամանակ հնարավոր խափանումներից խուսափելու նպատակով, բայց դրանց կարիքը չէր զգացվել:
Նշենք, որ շարժական էլեկտրակայաններից յուրաքանչյուրը կշռում է 150 տոննա, որոնք տեղափոխվում են Ան-24 օդանավերով կամ ծովով: Դրանց տեղափոխման համար պահանջվում է 2-3 ամիս:
«Կոմերսանտի» փոխանցմամբ՝ Սոչիում տեղակայված շարժական էլեկտրակայանները բավարար չեն Ղրիմի պոտենցիալ հզորության դեֆիցիտը ծածկելու համար: