Վատ չէ, երբ երիտասարդ քաղաքական գործիչները խորհուրդներ են տալիս, դա ողջունելի է, սակայն մեր քաղաքական մշակույթը դեռ այն մակարդակում է, երբ խորհուրդ տալ միավորվել տարբեր գաղափարախոսություններ ունեցող քաղաքական ուժերին, նշանակում է խառնել ձեւն ու բովանդակությունը: Այդ մասին լրագրողների հետ հանդիպման ժամանակ հայտարարել է «Ժառանգություն» կուսակցության խորհրդարանական խմբակցության ղեկավար Ռուբեն Հալոբյանը՝ մեկնաբանելով ԱԺ փոխխոսնակ Էդուարդ Շարմազանովի խորհուրդը «Ժառանգությանն» ու ՀԱԿ-ին դառնալ «Բարգավաճ Հայաստան» կուսակցության մի մասը:
«Ես հասկանում եմ, որ Շարմազանովին թվում է ՀՀԿ-ն անբեկանելի վեկտոր է, որն այդպիսին էլ կմնա, սակայն նրանք նպատակ ունեն տեսնել երկորդ քաղաքական վեկտորը՝ ամերիկյան մոդելի համաձայն»,- հայտարարել է Հակոբյանը՝ նշելով, որ միավորվում են միեւնույն գաղափարախոսություններ ունեցող քաղաքական ուժերը, իսկ արհեստական քաղաքական կոկտեյլի ստեղծումը ոչ մի երկրի ձեռնտու չէ: Այդ ենթատեքստում Հակոբյանն ընդգծել է, որ կոալիցիայի մաս չկազմող 4 քաղաքական ուժերը նույն կամ մոտ գաղափարախոսությունների կրողներ չեն:
Հակոբյանի խոսքով՝ հնարավոր է քաղաքական այնպիսի իրավիճակ ստեղծվի, երբ Հայաստանում միավորվեն կուսակցությունները. այս փոքր պետության համար 75 կուսակցության առկայությունն անընդունելի է եւ մեծ շքեղություն է. «Սակայն անհրաժեշտ է, որպեսզի քաղաքական դաշտը պատրաստ լինի դրան»: