Շվեդիայում Հայաստանի դեսպան Արտակ Ապիտոնյանը մարտի 13-ին հանդիպում է ունեցել «Էրիքսոն» ընկերության կենտրոնակայանում ընկերության փոխնախագահ, կառավարության եւ արդյունաբերության հետ հարաբերությունների գծով տնօրեն Ուլֆ Պերսոնի հետ։
ԱԳՆ մամուլի ծառայությունից հայտնում են, թե դեսպանին ներկայացվել է «Էրիքսոնի» գործունեությունը համաշխարհային տարբեր շուկաներում, հեռանկարային ծրագրերը, կազմակերպվեց ընկերության վերջին գիտական մշակումների ցուցադրություն։
Դեսպան Ապիտոնյանը եւ «Էրիքսոնի» փոխնախագահը քննարկել են Հայաստանում ընկերության ծրագրերը, ինչպես նաեւ գործունեության ընդլայնման հեռանկարները։ Տեղի է ունեցել մտքերի փոխանակում հեռահաղորդակցության ոլորտի, ինչպես նաեւ հեռուստատեսության թվայնացման եւ էլեկտրոնային առողջապահության ոլորտներում ներդրումային հնարավորությունների վերաբերյալ։
