Սիրիայի հյուսիսային քրդաբնակ շրջաններում տեղի զինված ուժերը ծանր պարտություններ են կրել «Ալ-Կաիդայի» սիրիական թեւ հանդիսացող «Իրաքում եւ Շամում իսլամական պետություն» խմբավորման հետ բախումներում, որից հետո Սիրիա են սկսել շարժվել Թուրքիայից Հյուսիսային Իրաք հեռացած PKK-ի զինյալները։
Թուրքական Milliyet-ի փոխանցմամբ՝ վերջին օրերին ահաբեկչական «Իրաքում եւ Շամում իսլամական պետություն» խմբավորումը ծանր հարվածներ է հասցրել Սիրիայի հյուսիսային շրջաններում քուրդ բնակչությունից կազմված PYD-ի զինյալներին։
Թուրքիայում քրդական հարցի կարգավորման հետ կապված Հյուսիսային Իրաքի Քանդիլի շրջան հեռացած PKK-ի (Քուրդիստանի բանվորական կուսակցություն-խմբ) զինյալները PKK-ի ռազմական թեւի առաջնորդ Մուրադ Քարայըլանի հրամանով շարժվում են Սիրիայի քրդաբնակ Ռաքքա եւ Կոբանի բնակավայրեր՝ կռվելու ահաբեկչական խմբավորումների դեմ։
Քրդական Firat գործակալության փոխանցմամբ՝ Սիրիայի քրդաբնակ շրջաններում ստեղծված իրավիճակի հետ կապված PKK-ն հայտարարություն է տարածել՝ կոչ անելով քրդերին համախմբվել թուրքական իշխանությունների կողմից աջակցություն ստացող ահաբեկիչների դեմ պայքարելու համար։