Երեւանի «Զվարթնոց» օդանավակայանի հետագա զարգացման եւ հին շենքի պահպանման մասին համաձայնություն է ձեռք բերվել, մարտի 28-ի մամուլի ասուլիսում հայտարարել է Ճարտարապետության եւ քաղաքաշինության հարցերով հանրային խորհրդի ենթահանձնաժողովի նախագահ Գրիգոր Ազիզյանը՝ հավելելով, որ պայմանավորվածության համաձայն՝ ճարտարապետ-կոնստրուկտորները եւս կմասնակցեն կոնցեսիոների նոր նախագծի մշակման աշխատանքներին՝ դիտարկելով հին շենքի պահպանման բոլոր հնարավորությունները:
Ազիզյանը նշել է, որ Հայաստանի Հանրային խորհուրդը տվյալ հարցում հետեւողական կլինի եւ կհետեւի գործընթացին:
«Զվարթնոցի» շենքը խորհրդային մոդեռնիստական ճարտարապետության համաշխարհային հայտնի հուշարձան է: Այդ շենքը պահպանելու կոչով Հայաստանի իշխանություններին դիմել է նաեւ Ճարտարապետների միջազգային միությունը», - նշել է Ազիզյանը՝ հավելելով, որ Հանրային խորհուրդը կդիմի ՀՀ մշակույթի նախարարության համապատասխան կառույց՝ առաջարկելով «Զվարթնոց» օդանավակայանի հին շենքն ընդգրկել պատմության եւ մշակույթի հուշարձանների պետական ռեեստրում:
Հիշեցնենք, որ մարտի 26-ին ՀՀ կառավարությանն առընթեր քաղաքացիական ավիացիայի գլխավոր վարչությունում այս հարցով քննարկում էր տեղի ունեցել՝ ինչպես պահպանել Երեւանի միջազգային «Զվարթնոց» օդանավակայանի հին շենքը, որը քանդելու կողմնակից է կոնցեսիոները: