Ապրիլի կեսին Երեւան կժամանի Ռուսաստանի դաշնային միգրացիոն ծառայության ղեկավար Կոնստանտին Ռոմոդանովսկին: Այդ մասին NEWS.am-ի թղթակցին հայտնել է Հայաստանի տարածքային կառավարման նախարարության պետական միգրացիոն ծառայության տնօրեն Գագիկ Եգանյանը: Նրա խոսքով՝ հանդիպման հիմնական թեմաներից կլինի միգրանտների կարգավիճակը, ովքեր ժամանակին չեն երկարաձգել ՌԴ-ում իրենց հաշվառումը եւ Հայաստան վերադառնալուց հետո այլեւս չեն կարողանա մուտք գործել ՌԴ: Նշենք, որ այդ խմբի մեջ մտնում է Հայաստանի մոտ 175 հազար քաղաքացի:
Կքննարկվեն նաեւ «ՌԴ մուտքի ու ելքի» եւ «ՌԴ-ում օտարերկրացի քաղաքացիների կարգավիճակի մասին» օրենքների փոփխությունները, որոնք գործում ն 2014թ.-ի հունվարի 1-ից: Այդ օրենքների համաձայն՝ 2014թ.-ի սկզբից այն երկրների քաղաքացիները, որոնք Ռուսաստանի հետ առանց վիզաների ռեժիմից են օգտվում, այդ թվում նաեւ Հայաստանի քաղաքացիները, կարող են Ռուսաստանում մնալ 90 օրից ոչ ավել յուրաքանչյուր 180 օրը մեկ: Այլ կերպ ասած, կարճաժամկետ ելք-մուտքը նոր 90 օր ստանալու համար, այժմ չի գորոծում: Կարգը խախտողները ՌԴ մուտք գործելու իրավունքից կզրկվեն 3 տարի ժամկետով:
