Միացյալ Նահանգները Մոլդովային լրացուցիչ 10 մլն դոլար կտրամադրեն սահմանների անվտանգությունը բարձրացնելու համար: Այդ մասին Քիշնեւում հայտարարել է Եվրոպայի եւ Եվրասիայի գործերով ԱՄՆ-ի պետքարտուղարի օգնական Վիկտորիա Նուլանդը երկրի արտգործնախարար Նատալիա Գերմանի հետ համատեղ մամուլի կոնֆերանսում:
Նուլանդը նշել է, որ այցի ընթացքում քննարկվել է տարածաշրջանում ստեղծված իրավիճակը կապված Ուկրաինայի ճգնաժամի եւ Մերձդնեստրի խնդրի հետ:
«Ես եկել եմ նաեւ հայտարարելու ԱՄՆ-ի աջակցության մասին հանրապետության ինքնիշխանությանն ու տարածքային ամբողջականությանը: Մենք Քիշնեւին լրացուցիչ 10 մլն դոլար կտրամադրենք սահմանների անվտանգությունը բարձրացնելու համար»,- հայտարարել է դիվանագետը, հաղորդում է ԻՏԱՌ-ՏԱՍՍ-ը:
Նրա գնահատմամբ՝ Վաշինգթոնի եւ Քիշնեւի միջեւ հարաբերությունները զարգացման գագաթնակետում են:
«ԱՄՆ-ն աջակցություն կցուցաբերի մոլդովական կառավարության ռեֆորմներին, որոնք ուղղված են Եվրոպական միության ինտեգրացմանը: Մենք ցանկանում ենք այդ երկիրը տեսնել անկախ, բարգավաճող ու եվրոպական»,- եզրափակել է Նուլանդը:
