Քեսաբի դեպքերի համատեքստում ցանցում հայտնված տեսանյութերը միգուցե Սիրիայում են նկարահանվել, սակայն ակնհայտաբար Քեսաբում չեն արվել: Այս մասին այսօր Երեւանում կայացած մամուլի ասուլիսում հայտարարել են նախկինում Քեսաբի բնակիչներ եղած Սերժ եւ Արամ Կալուկյանները:
Ս. Կալուկյանի խոսքով՝ երեխաների դիակներով լուսանկարները եւս Քեսաբում չեն արվել, քանի որ երեխաներն առաջնահերթ էին դուրս բերվել քաղաքից: Քեսաբցիների ճնշող մեծամասնությունը մտադիր է անհապաղ վերադառնալ Քեսաբ, հենց որ սիրիական զորքերը գրավեն քաղաքը:
Կալուկյանները նաեւ նշեցին, որ վերջին տվյալներով՝ սիրիական բանակին հաջողվել է որոշակի հաջողություններ գրանցել եւ զգալի հարված հասցնել գրոհայիններին: Նրանք նշում են, որ մարդիկ պատրաստ են տուն վերադառնալ, սկսել զրոյից եւ քաղաքի ինքնապաշտպանություն կազմակերպել:
