Ադրբեջանից Հայաստան փախած ընտանիքը ստանում է ՀՀ օրենսդրությամբ նախատեսված ողջ աջակցությունը, հայտարարել է ՀՀ Միգրացիոն ծառայության պետ Գագիկ Եգանյանը` NEWS.am-ի թղթակցի խնդրանքով մեկնաբանելով ադրբեջանական լրատվամիջոցներում հայտնված լուրերը` իբր ընտանիքի հոր արտահայտած դժգոհության մասին:
«Ջավիդ Օրուջեւի դժգոհության մասին առաջին անգամ եմ լսում: Կարծում եմ, որ ճիշտ կլիներ, եթե իհարկե, տեղեկությունը համապատասխանում է իրականությանը, առաջին հերթին դժգոհության մասին հայտնել բնակության վայր հանդիսացող երկրի իրավասու մարմիններին: Միեւնույն ժամանակ, ցանկանում եմ ընդգծել, որ Օրուջեւի ընտանիքը ստանում է այն ամենը, ինչ նախատեսված է ՀՀ օրենսդրությամբ: Իհարկե, դա քիչ է նրանից, ինչը կարող էին ակնկալել եվրոպական ցանկացած երկրում, սակայն յուրաքանչյուր երկիր անում է այն, ինչ կարողանում է», - նշել է Գագիկ Եգանյանը: Ինչ վերաբերում է աշխատանքի տեղավորելու կամ երեխաների կրթության վերաբերյալ հարցերին, ապա ադրբեջանական ընտանիքն ունի մյուս բոլոր փախստականներին հավասար համապատասխան բոլոր իրավունքները: Ինչ վերաբերում է ընտանիքը երրորդ երկիր ուղարկելուն կամ ՄԱԿ-ի ՓԳՀ-ի ներկայացուցիչնեին հանդիպմանը, Գագիկ Եգանյանը հիշեցրել է, որ Հայաստանը դրա հետ կապ չունի: «Ջավիդ Օրուջեւն ընտանիքի հետ ճնշումներից պաշտպանություն է խնդրել, մենք իրենց այդպիսի պաշտպանություն ենք տրամադրել», - ընդգծել է Գագիկ Եգանյանը:
Ադրբեջանի լրատվամիջոցներում հրապարակումներ էին հայտնվել` իբր BBC-ին տրված Ջավիդ Օրուջեւի հացազրույցի հիման վրա: Ըստ Ադրբեջանի լրատվամիջոցների ներկայացման` Օրուջեւն իբր դժգոհում է բնակության պայմաններից, բողոքում, որ ոչ ոքից «ոչ մի կոպեկ» չի ստանում: Օրուջեւը բողոքել է նաեւ, որ ոչ մի կերպ չի կարողանում հանդիպել ՄԱԿ-ի Գերագույն հանձնակատարի հետ: «Ինձ նույնիսկ նրա մոտ չեն թողել: Ես այստեղ արդեն երեք ամիս եմ, իսկ նրա հետ դեռ չեմ տեսնվել», - ասել է նա:
Հունվարի 29-ին հայ-վրացական սահմանի «Բագրատաշեն» մաքսային անցակետ էր դիմել Բաքու քաղաքի բնակիչ Ջավիդ Օրուջեւը (ծնվ. 1976 թ..)` կնոջ եւ երեք երեխաների հետ: Տղամարդը քաղաքական ապաստան էր խնդրել:
Իր որոշումը Ադրբեջանի քաղաքացին հիմնավորել է նրանով, որ հայրենիքում հալածանքների է ենթարկվել: Մասնավորապես, Օրուջեւը հայտնել է, որ հատուկ ծառայությունների ճնշումը սկսվել է հայկական ծագմամբ Ռոյա Միրզոեւայի հետ (ծնվ. 1983 թ.) իր ամուսնությունից հետո: Հալածանքներին չդիմանալով՝ Օրուջեւը ստիպված է եղել համագործակցել Ադրբեջանի հատուկ ծառայությունների հետ եւ կնոջ արտասահմանցի հարազատներից Հայաստանի եւ սփյուռքի մասին ստացված տեղեկությունները հաղորդել նրանց:
Ընտանիքի գլխին կախված վտանգը գիտակցելով՝ Օրուջեւը եվրոպական երկրներից մեկում հաստատվելու անհաջող փորձ է ձեռնարկել: Կրկին Բաքու ուղարկվելուց հետո նրա նկատմամբ հատուկ ծառայությունների ճնշումը սաստկացել է:
Անելանելի դրության մեջ հայտնվելով՝ Օրուջեւը որոշել է քաղաքական ապաստան խնդրել Հայաստանից: Հայկական ընտանիքը ապաստան է տվել նրանց:
