Ղրիմի շուրջ իրադարձությունները Լեռնային ղարաբաղի վրա ուղղակի ազդեցություն չեն ունենա: Գերմանական EurActiv պարբերականին տված հարցազրույցում այսպիսի կարծիք է հայտնել ԼՂՀ Ազգային Ժողովի նախագահ Աշոտ Ղուլյանը:
«Ուկրաինայում եւ մասնավորապես` Ղրիմի շուրջ ծավալված իրադարձությունները, իրենց աշխարհագրությամբ եւ առանձնահատկություններով, չեն կարող ուղղակի ազդեցություն ունենալ Լեռնային Ղարաբաղի վրա»,-ասել է նա:
Անդրադառնալով Ադրբեջանի հետ հարաբերություններին, Ղուլյանը նշել է, որ վերջինիս դրսեւորած` իրականությունից հեռու տեսլականները լուրջ խոչընդոտ են հանդիսանում` երկու անկախ պետությունների խաղաղ գոյակցման համար հիմքեր մշակելու տեսանկյունից:
Նրա խոսքերով, ԵԱՀԿ Մինսկի խմբի համանախագահության ինստիտուտն ապացուցել է իր գործուն միջնորդական մեխանիզմները, եւ եթե գործադրված ջանքերը հաջողությամբ չեն պսակվել, ապա դրա համար պատասխանատու են ոչ համանախագահները, եւ ոչ էլ առավել եւս միջնորդական ձեւաչափը, ինչպես ադրբեջանական կողմն է փորձում ներկայացնել:
