Թուրքիայում գտնվող ԱՄՆ Կոնգրեսի Ներկայացուցիչների պալատի նախագահ Ջոն Բեյները հանդիպել է Թուրքիայի վարչապետ Ռեջեփ Թայիփ Էրդողանի հետ, որի ընթացքում կողմերը խոսել են նաեւ ԱՄՆ Սենատ ներկայացված հայկական բանաձեւի մասին։
Թուրքական Sabah-ը՝ վկայակոչելով վարչապետի աշխատակազմի իր աղբյուրներին, գրել է, թե վարչապետ Ռեջեփ Թայիփ Էրդողանը ԱՄՆ Կոնգրեսի Ներկայացուցիչների պալատի նախագահ Ջոն Բեյների հետ հանդիպմանը զգուշացրել է, որ Թուրքիան հայկական բանաձեւերի հետ կապված զգայուն է եւ շեշտել, թե անհրաժեշտ է թույլ չտալ, որ այդ թեման բացասաբար անդրադառնա երկկողմ հարաբերություններին։
Ըստ Sabah-ի՝ Ջոն Բեյներն ասել է, թե այդ թեման պետք է քննարկեն պատմաբանները։
Նշենք, որ ավելի վաղ Ջոն Բեյները հանդիպել էր Թուրքիայի խորհրդարանի նախագահ Ջեմիլ Չիչեքի հետ, որի ժամանակ էլ Չիչեքը հայտարարել էր, թե պատմությունը պետք է թողնել պատմաբաններին։
