Ուկրաինայի նախկին վարչապետ Նիկոլայ Ազարովի նկատմամբ հետախուզում է հայտարարվել: Այդ մասին «Ինտեր» հեռուստաալիքի եթերից հայտարարել է Ուկրաինայի գլխավոր դատախազի պաշտոնակատար Օլեգ Մախնիցկին:
Նրա խոսքով՝ Ազարովին մեղադրում են իշխանության եւ պաշտոնական դիրքի չարաշահման մեջ: Այս պահին Ազարովի ձերբակալման ուղղությամբ օպերատիվ-հետախուզական գործողություններ են իրականացվում:
Հիշեցնենք, որ Վիեննայի դատախազությունը հետաքննություն է սկսել Ուկրաինայի նախկին նախագահ Վիկտոր Յանուկովիչի շրջապատից մի քանի անձնանց նկատմամբ, որոնց մեղադրում են փողերի լվացման եւ այլ հանցագործությունների մեջ: Նրանց թվում են նախկին վարչապետ Նիկոլայ Ազարովը եւ նրա որդի Ալեքսեյը:
