ՌԴ նախագահ Վլադիմիր Պուտինը կարծում է, որ Ուկրաինայում նախագահական ընտրությունների քարոզարշավն ընթանում է անթույլատրելի ձեւաչափով եւ եթե հետագայում էլ այդպես շարունակվի, ռուսական իշխանությունները չեն կարող դրանք լեգիտիմ ճանաչել:
«Նախագահական մրցավազքը միանգամայն անընդունելի ձեւով է: Եթե հետագայում էլ այդպես շարունակվի, մենք, իհարկե, չենք կարող մայիսի 25-ից հետո կատարվող գործընթացները լեգիտիմ ճանաչել», - ասել է Պուտինը:
Նախագահը հավելել է, որ Ռուսաստանը չի ճանաչում Կիեւի ներկայիս ղեկավարների լեգիտիմությունը, սակայն չի հրաժարվում շփումներից:
«Մենք իսկապես ներկայիս իշխանությունն ապօրինի ենք համարում, եւ նրանք այդպիսին լինել չեն կարող, նրանք երկիրը կառավարելու համազգային մանդատ չունեն: Սակայն մենք չենք հրաժարվոմ յուրաքանչյուրի հետ շփումներից», - ասել է Պուտինը:
Նա հիշեցրել է, որ նախարարական մակարդակով «շփումները բաց են»:
«Մեր նախարարները պահում են կապն ուկրաինացի գործընկերների հետ: Դմիտրի Անատոլիեւիչ Մեդվեդեւը խոսել է Յացենյուկի հետ, Նարիշկինը` Տուրչինովի հետ», - ասել է Պուտինը: