Նախքան Հայաստանի վրա Ռուսաստանում քաղաքացիության մասին օրենքում փոփոխությունների ազդեցության վերաբերյալ կանխատեսումներ անելը, հարկավոր է սպասել դրա ուժի մեջ մտնելուն, NEWS.am-ի թղթակցի հետ զրույցում ասել է Միգրացիոն ծառայության պետ Գագիկ Եգանյանը:
Ըստ նրա` օրենքն ուժի մեջ մտնելուց հետո որոշ ժամանակ անց հետազոտություն կանցկացվի` կան արդյոք նոր փոփոխություններ միգրացիոն հոսքերում, թե ոչ: Ի պատասխան հարցին, թե, այնուամենայնիվ, սպառնալիք կա արդյոք Հայաստանի համար, Եգանյանը նշել է, որ եթե քաղաքացիություն ստանալն ուղեկցվի մշտական բնակության վայրը փոխելու հետ, ապա դա իսկապես սպառնալիք կլինի: «Միգրանտը չի փոխում քաղաքացիությունը, տվյալ դեպքում խոսքը քաղաքացիությունը եւ բնակության վայրը փոխելու մասին է, դա, իհարկե, բացասաբար կազդի Հայաստանի վրա: Դա կդառնա արտագաղթին նպաստող գործոն»:
Հիշեցնենք, Ռուսաստանի Պետդուման երկրորդ ընթերցմամբ փոփոխություններ էր մտցրել քաղաքացիության մասին օրենքում, որը ռուսախոս հայրենակիցների համար հեշտացնում է քաղաքացիություն ստանալու գործընթացը: