Կոլումբիայի նախագահ Խուան Մանուել Սանտոսը երկրում եռօրյա սուգ է հայտարարել` հայտնի գրող Գաբրիել Գարսիա Մարկեսի մահվան կապակցությամբ:
«Կոլումբիան սգում է, մեզ լքել է բոլոր ժամանակների ամենասիրելի հայրենակիցը: Գաբրիել Գարսիա Մարկեսը, Նոբելյան մեր մրցանակակաիրը, կոլումբիացիր, որը մեր երկրի ողջ պատմության ընթացքում կարողացավ բարձրացնել իր հայրենիքի անունը», — հայտարարել է Սանտոսը:
Հայտնի գրողի հրաժեշտի արարողությունը տեղի կունենա ապրիլի 21-ին` Մեխիկոյի Գեղարվեստի պալատում, հայտնել է Մեքսիկայի մշակույթի ազգային կոմիտեի նախագահ Ռաֆայել Տերեսան:
Հիշեցնենք, որ հայտնի գրողը վախճանվել է 88 տարեկան հասակում` Մեքսիկայում: Մի քանի օր առաջ նա դուրս էր գրվել հիվանդանոցից, ուր անցկացրել էր մեկ շաբաթ: Նա հիվանդանոց էր տեղափոխվել թոքերի ինֆեկցիայի եւ օրգանիզմի ջրազրկման հետեւանքով:
Գաբրիել Գարսիա Մարկեսը կոլումբիացի հռչակավոր արձակագիր էր, լրագրող, հրապարակախոս եւ քաղաքական գործիչ, 1982թ. Գրականության Նոբելյան մրցանակի դափնեկիր: Նա «XX դարի լատինամերիկյան եւ համաշխարհային արձակի առաջատար դեմքերից էր: Նա «Պատրիարքի աշունը», «Սերը ժանտախտի ժամանակ», համաշխարհային փառք բերած «Հարյուր տարվա մենություն» վեպերի, «Գնդապետին ոչ ոք չի գրում», «Գեներալն իր լաբիրինթոսում» պատմվածքների եւ շատ այլ հանրահայտ ստեղծագործությունների հեղինակ է:
