Ֆիլիպինների կառավարության եւ այդ երկրում գործող «Մորո» ազատագրականիսլամական ճակատի պաշտոնական ներկայացուցիչները օրինագիծ են ստորագրել` երկրի հարավում Բանգսամորո ինքնավար մարզ ստեղծելու վերաբերյալ, հայտնում է «ՌԻԱ նովոստին»` վկայակոչելով տեղի ազգային տեղկատվական գործակալությունը:
Փաստաթուղթը ստորագրվել է հարավային Կոտաբատո քաղաքում` Բանգսամորոյի անցումային հանձնաժողովի նիստի ժամանակ: Ստորագրված օրինագիծը հանձնվելու է երկրի նախագահ Բենիգնո Ակինոյի դիտարկմանը, որը պաշտոնապես այն պետք է ներկայացնի Կոնգրեսում: Փաստաթուղթը չի հրապարակվի, քանի դեռ խորհրդարանն այն չի քննարկել:
Ֆիլիպիններում հիմնականում բնակվում են քրիստոնյաներ, սակայն երկրի հարավում մեծամասնություն են կազմում մահմեդականները: Իշխանությունների եւ ՄԱԻՃ-ի միջեւ կոնֆլիկտը շարունակվում է 40 տարի: Դրա զոհ են դարձել 150 հազար մարդ:
2012 թ. հոկտեմբերին ստորագրված համձայնագիրը նախատեսում է Ֆիլիպինների հարավում ներկայիս գոյություն ունեցող մահմեդական Մինդանաո ինքնավար մարզի փոխարեն (АРММ) ստեղծել Բանգսամորո միավորումը (Bangsamoro):
