Հայոց ցեղասպանության թանգարան-ինստիտուտում, այսօր՝ ապրիլի 21-ին, մեկնարկել է «Առաջին համաշխարհային պատերազմի կովկասյան ճակատ. Ցեղասպանություն, փախստականներ եւ հումանիտար օգնություն» միջազգային գիտաժողովը:
Երկօրյա գիտաժողովը նպատակ ունի անդրադառնալ Առաջին համաշխարհային պատերազմի Կովկասյան ճակատում ռազմական գործողությունների, փախստականների առկայության եւ պատերազմական իրավիճակում Օսմանյան կայսրության եւ նախկին Ռուսական կայսրության տարածքում հայ ազգաբնակչության նկատմամբ ցեղասպանության իրագործման դրվագներին: Գիտաժողովի ընթացքում դիտարկվող հարցերը ներառում են հետեւյալ թեմաները`
• Պատերազմ եւ ցեղասպանություն
• Ռուս զինվորականները՝ որպես ցեղասպանության վկաներ
• Զինվորական լուսանկարիչները եւ «մոռացված պատերազմի» Կովկասյան թատերաբեմի կինոժամանակագրությունը
• Պատերազմը եւ գիտությունը. հնագիտական եւ ազգագրական հետազոտությունները Հայաստանի տարածքում պատերազմի ընթացքում
• Հանցագործություն ընդդեմ մարդկության եւ քաղաքակրթության
• Ռազմագերիների եւ անհայտ կորածների կարգավիճակը եւ ճակատագիրը
• Պատերազմը եւ կամավորական շարժումը
• Մարդասիրական օգնությունը եւ փախստականները
• Բարեգործությունը Կովկասյան ռազմաճակատում
Նշենք, որ միջազգային գիտաժողովին նախորդել է Առաջին համաշխարհային պատերազմի սկսման 100-ամյակին նվիրված ժամանակավոր ցուցահանդեսի բացումը:
