Ամերիկացի սենատորները Սպիտակ Տանը կոչ են անում խստացնել Ռուսաստանի դեմ ուղղված տնտեսական պատժամիջոցները:
Սենատի արտաքին հարաբերությունների հանձնաժողովի անդամներ հանրապետական Բոբ Քորները եւ դեմոկրատ Քրիս Մերֆին հայտարարել են, որ ԱՄՆ նախագահի կողմից նման գործողությունները համարժեք պատասխան կլինեին Կրեմլի կողմից Ուկրաինայի իրավիճակի լարմանը, հաղորդում է ՈՒՆԻԱՆ-ը՝ վկայակոչելով «Ազատություն» ռադիոկայանը:
Այսպես, Բոբ Քորները նշել է, որ ԱՄՆ պատժամիջոցները պետք է ներառեն Ռուսաստանի էներգետիկ սեկտորի, մասնավորապես «Գազպրոմի», ինչպես նաեւ ռուսական բանկային համակարգի նկատմամբ ճնշումները:
Հանրապետականի կարծիքով՝ այն, որ Արեւմուտքը Ուկրաինային մենակ է թողնում Ռուսաստանի դեմ հանդիման, «անխիղճ» արարք է:
Իր հերթին, սենատոր Քրիս Մերֆին հայտարարել է, որ եթե ԱՄՆ-ը չօգնի Ուկրաինային, Ռուսաստանի հաջորդ զոհը կարող է դառնալ ՆԱՏՕ-ի անդամ երկրներից որեւէ մեկը: